Wae höbbe eine nuuje Prins!!!
Prins Eric I is op 15 november 2009 oêtgerope als de nuuje prins vanne Kwakkert.
Proklamasie
Bie de grasie van de Kwakkert en de waalwillendjheid van Vorst Bart I
en ziêne alwiêze Raod van Ellef, 55ste Prins van dees Kwakkertepool,
SALUUT
Wae proklamere, det de regering is äövergenaome van Prins Martijn I,
en det wae as liefspräök zulle veure: "Kwakkert of Kaker det is good, Vastelaovendj zitj ós in 't blood" Wae, Prins Eric I,
Kómmandeur; inne orde van daak- en bótteramplate Offeseer; inne orde van losse flodders en waerse patroeëne Graaf; van 't Maxet, 't Kerrevèn en de Kwakkertepool, en alles waat drin zitj Landjhieër; van de Leiversewaeg, naeve 't Kerrevèn nao de Kreppel, van dao-oêt äöver de Birkebos, langs Sjra van Haeskes op Truje aan, den äöverver de Berg en de Spaanse Baan nao de Maxeterdiêk, truuk nao de Leiversewaeg, achterlangs Baer van Spee nao de Aerebos en de Baelebrook, den bènnedoor op Kerre Thei aan, en naeve Drees van Naadje weer heivers Besjermhieër; van Susan en de drie Musketiers, Jeroen, Martijn en Rick Groeëtvorst; van de Kakers, en 'nne knieên van 6 miljoen
Wae proklamere wiejer;
(ten)
Det groeëtvorst Frans zag, gauw doon, wae regele 't waal bie de Kakers
Det ich eigelik in rang bèn gezaktj, van Vorst nao Prins, mer ich bèn toch mer sjoeën de 55ste …… Kwakkerteprins
Det ouch dit pekske mich zitj wie 'n aangebaore waemeske
Det wae dit jaor oppe Kèrmis neet väöl attracties mieër haje as op, …… pak weg ….. de Heibloom, mer det de taxikoste väör de kèrmisluuj van 't evenementetrein nao 't dörp, de prieêze waal duchtig höbbe opgedraeve
Det 't begruuëtingstekort van de gemèndje lètj tot 'n äöversjot …. aan drek, mer det Kwakkerte zich hie waal good in thoeês veule
Det de Harmenie dit jaor 'n geweljdige prestasie haet geleverdj door 'nne ieërste prieês te haole op 't WMC, en det 't idee van inlieëners mesjien ouch get is väör de sjötterie, asse d'n Um 'nne kieêr nao Heitse wille haole
Det de leechtpiramide is oeêtgebrèdj met 'n lasershow, mer det op dit moment allein nog mer de processemaekers d'r lol aan höbbe
Det 't nao 15 jaor weer ins tieêd is, detter 'nne Prins oeêt 't boeêtegebied kumptj, mer desse mekkelikke sjoon aan mos doon nao de Waever, anges löpse oppe door wiej 'n heks, die 't gaat geit branje
Det hieël get Heitser luuj dit jaor met de Kèrmis duchtig spek op de rubbe haje, mer det de Koeêlekop d'r ongetwieêfeldj väör geit zörge, det ze volgendj jaor ederein kinne bedene
Det börgemeister Arno Verhoeven, net as zieêne väörganger, zien gemèndje gaer ins van baovenaaf zuut, en det 'n vlegendje kraon mieër vingtj as ein die op 't nest blieft zitte
Det wae 't hiebie zulle laote
Gegaeve, wiej Bart beldje, en efkes later vroog: "Laef se nog?"
Prins Eric I
Väör anger nuuts, laes hie wiejer en hie väör de foto's
